Астана – 15

АСТАНА – ҚАЗАҚСТАННЫҢ ҰЛЫ ДӘУІРІ ЖӘНЕ СТРАТЕГИЯЛЫҚ ВЕКТОРЫ

010101Нұрсұлтан Назарбаев,
Қазақстан Республикасының Президенті

Үстіміздегі жылдың 5 шілдесінде «Астана Опе­ра» мемлекеттік опера және балет теа­трын­да Астананың 15 жылдығына арналған сал­танатты жиын болып, онда ҚР Президенті Н. Ә. НАЗАРБАЕВ сөз сөйлеп, барша қа­зақ­­­стандықтар мен астаналықтарды жә­не Астананың мәртебелі меймандарын бас қаланың 15 жылдық мерейтойымен құт­тықтады.

Осыдан 15 жыл бұрын Қазақстан Республикасының жаңа елордасы Астана бүкіл әлемге салтанатты түрде таныстырылған болатын. Сол уақытқа дейін елорданы ауыстыру туралы идея тұжырымдамалық тұрғыдан ой елегінен өткізіліп, мәселе шешілген, орталық мемлекеттік органдарды қабылдап, орналастыру бойынша қажетті дайындық жұмыстары жүргізілген және оларды Алматыдан ұйымдасқан түрде көшіру жүзеге асырылған күрделі де драмаға толы жылдар артта қалған еді. Енді, міне, 15 жыл бойы біз шын мәнінде еліміз тарихының АСТАНАНЫҢ ҰЛЫ ДӘУІРІ деп атауға толық құқымыз бар жаңа кезеңінің есебі жүріп жатыр…

Жаңа қала философиясы

ЕсимҒарифолла ЕСІМ,
жазушы, академик,
Парламент Сенаты депутаты

Қоғам әрбір адам үшін бәйге алаңы, мүмкіндіктер алаңы. Адамдардың қоғам болып топтасуы өзінен-өзі болатын шаруа емес. Әрбір қоғамның өз тарихы бар. Адамдарды топтастыратын күш, ол мақсат ортақтығы, олай болмаған жағдайда қоғам жоқ. Қоғам мәңгілік құбылыс емес, ол қалыптасып, жойылып, жаңарып отырады. Қоғам жаңарып отырмаса, ол күйрей бастайды, мұндай тарихи жағдайды біз басымыздан кешірдік. Көрер көзге мәңгілік секілді көрінген кеңес қоғамы өткен ғасырдың тоқсаныншы жылдарына жете бере ыдырай бастап, ақыры қарасы батып жойылып, тарихқа айналды. Мұның басты себебі – адамдардың қауымдасып, қоғамдасып өмір сүру тәсілінің ортақ мақсаты өз күшін сарқа бастаған еді. Ортақ идея жойылған соң, кеңес қоғамы да мәнін жойды, оның орнына жаңа қоғамдар құрыла бастады, соның бірі – қазақстандық қоғам болатын.